The Life of David Gale (LDG) -> 3 Deewarein -> விருமாண்டி

சமீபத்தில்தான் The Life of David Gale படம் பார்த்தேன். சட்டென்று இதற்கு முன் கண்ட மற்ற இரு படங்களின் கதை அமைப்பு நினைவுக்கு வந்தது. ஒரு கொலை அல்லது பல கொலைகள் செய்த ஒருவன் கைது செய்யப்படுகிறான். கொலைக்குற்றத்திற்கான தீர்ப்பு வழங்கப்பட்டு மரண தண்டனைக்காக நாட்களை கொன்று கொண்டிருக்கிறான். பேட்டி காண வருகிறாள் ஒரு பெண். செவி வழி அறிந்த செய்தியை குற்றவாளியின் வாய் வழி கேட்டு பின் ஆதாரங்களைத் தேடி தீர விசாரிக்கிறாள். முடிவில் மரண தண்டனை நிறைவுறும் நாளில் உண்மையைக் கண்டு பிடிக்கிறாள். குற்றவாளியை காக்க முயல்கிறாள். ஆங்கில படத்தில் தோல்வி அடைபவள் இந்திய படங்களில் வெற்றி அடைகிறாள்.

LDG - Kevin Spacey [ The Usual Suspects, Se7en, American Beauty] -யின் இயல்பான கூர்மையான நடிப்பில் மிளிர்கிறது. ஆரம்பத்தில் கல்லூரி விரிவுரையாளராக வகுப்பில் கலக்குவதும், "தண்ணித்தொட்டி தேடி வந்த கன்னுக்குட்டியாய்"-ஆகி பின் மகனை பிரிந்து கலங்குவதும், ரத்த புற்றுநோயால் அவதியுறும் நண்பிக்கு ஆதரவாய் இருப்பதும், "முதல்வன்" பாணியில் ஆளுநரிடம் பேட்டி எடுப்பதுமாய் புகுந்து விளையாடியிருக்கிறார். பின் மண்டையில் ஓங்கி அடித்ததுப் போல வரும் ஊகிக்க முடியாத படத்தின் முடிவும் அருமை. Death Penalityக்கு எதிரான கருத்துக்களை ஆணித்தரமாக படம் முழுவதும் தூவியிருக்கிறார்கள். "விருமாண்டி"யைப்போல வெறும் வாய் பேச்சுடன் முடியவில்லை இப்படம் - "அதையும் தாண்டி தியாகத்திலானது.......". நிருபராய் வரும் Kate Winslet படம் முடிவுறும் தருவாயில் - துப்பு துலங்க தானே Victim-ஆக - மாறி மிரட்டியிருப்பார்.

3 Deewarein- மூன்று கொலைகளையும் மூன்று வேவ்வேறு மனிதர்களையும் ஒரே சரடில் இணைக்கும் புத்திசாலித்தனமான திரைக்கதையால் கவர்ந்தது. அலட்டலில்லாமல் வரும் நசருதீன்ஷாவும் அமைதியாய் வரும் ஜாக்கிஷரப்பும்தான் நாயகர்கள். நாகேஷ் குக்குன்னூர் வெகுளியாக நடிக்க முயன்று இருப்பார். நிருபராய் வரும் ஜுகிசாவ்லா கையில் மெழுகுவர்த்தியுடன் கணவனை மிரட்டுகையில் பீதியை கிளப்பியிருப்பார். சிறையில் வரும் சின்னச் சின்ன சம்பவங்கள் The Shawshank Redemption படத்தினை நினைவுப் படுத்தும் [ சிறையை விட்டு போக மனமில்லாமல் சககைதியை கொல்ல முனைதல், சககைதியினை ஓரினப் புணர்ச்சிக்கு வற்புறுத்தல் என].

விருமாண்டி - Rashômon - Ctrl+C & Ctrl+V. கொத்தாளத் தேவர்,விருமாண்டி,அன்னலட்சுமி[ "எம் புள்ளைக்கு டெண்டுல்கர்ன்னு தான் பேர் வைப்பேன்" ], ஏஞ்சலா காத்தமுத்து - நடிப்பின் வரிசை. கடைசி காட்சிகளை மெருக்கெற்றியிருந்தால் கவர்ந்திருக்கும்.

LDG தந்த அதிர்வு மற்ற படங்கள் ஏனோ தரவில்லை. மூன்றில் நான் ரசித்த படங்களின் வரிசையில் தலைப்பை தந்துள்ளேன் [ எதிலிருந்து எதை உருவி இருக்கிறார்கள் என்ற வரிசையில் அல்ல :-) ].